Sa Lahat ng Sakripisyo at Pagmamahal, Salamat Aking Guro

ni Millean Longno 

Ma’am. Sir. Ito ang bukambibig natin sa araw-araw na halos hindi matapos-tapos hanggang sa ating pagtanda. Sina Ma’am at sir na siyang nagbigay ng mga aralin na baon-baon. Sina Ma’am at sir na humubog sa ating mga kakayahan. Sina Ma’am at sir na nagbigay sa atin ng mga pangaral sa buhay. Sina Ma’am at sir na naging hagdan tungo sa pag-abot sa minimithing pangarap.

Ang salitang 'guro' ay umukit ng kakaibang damdamin sa ating mga puso at tumatak ng kakaibang antas ng paggalang at paghanga. Sila ang tinuturing na pangalawang magulang na nagtuturo sa atin na laging piliing tahakin ang tamang landas sa pamamagitan ng kanilang mga pangaral at paggabay na nagpapaalala sa atin sa kung ano nga ba talaga ang naaayon at nararapat.

Mula pagkabata kung saan kababakasan ng kawalang alam at pagiging inosente hanggang sa kasalukuyan nating kilalagyan kung saan nagkaroon ng muwang sa sitwasyon ng mundong ginagalawan,  ang ating mga guro ang laging nariyan upang ialay ang sarili at ibahagi ang angking kaalaman sa bawat isa sa atin. Maraming pagkakataon sa kanilang buhay na hindi na nila maasikaso ang kanilang sarili matugunan lamang ang mga pangangailangan sa paaralan at magampanan ang propesyong nakatakda.

Sa pag-unlad ng isang bansa, tiyak na malaki ang kontribusyon ng bawat guro. Sabi nga nila, “Teaching is the profession that creates all other professions.” Sila ang puno’t dulo ng lahat ng taong nakatungtong sa kani-kanilang sariling propesyon. Paulit-ulit man kung pakinggan subalit ang katotohanang ito ay mahirap mapasusubalian. Walang doktor na gumagamot sa atin, walang mga enhenyero na gumagawa ng mga gusali, walang piloto na magpapalipad ng eroplano, at iba pang trabaho na siyang nagpapalago sa ekonomiya ng bansa kung walang gurong humulma at humubog sa kanila.

Bilang pangalawang magulang, ang ating mga guro ang maituturing na susi sa ating mga pangarap.  Magulang man natin ang unang tumulong sa atin na mamulat sa mundo at nagsusustento sa ating pang-araw-araw na pangangailangan, ngunit ang ating mga guro ang siyang gumising sa ating natutulog na kakayahan at nagbukas sa ating kaisipan na siya namang naging sandata sa pag-abot sa hinahangad na pangarap. Sila ang mga susi sa bawat pintuan ng ating pansariling kakayahan kung saan nagagawa nating matuklasan at mahubog ang ating mga potensyal nang malaya, malikhain, at buong-buo.

Sa pagdiriwang sa natatanging araw ng ating mga guro, nawa ay maipadama natin ang ating taos-pusong pasasalamat at pagkilala sa lahat ng sakripisyo at pagmamahal na walang pag-aatubiling iginawad nila sa atin.

Mabuhay ang lahat ng GURO sa mundo. Hangad namin ang lahat ng pagpapala at biyaya ng Maykapal ngayon at sa bukas na darating… Mabuhay kayo!

Guhit ni Joshua B. Baquilar